Bunny in a Hurry DIY Kit ( random金色凹凸 )

｜月餅罐奔尼兔風車 Bunny in a Hurry🐇💨｜ 用風力推動嘅鐵皮兔子，我覺得望住佢地跑，好治癒⋯ 以下係好長嘅develop文： 對上一次關於中秋嘅設計已經係6年前嘅鋁罐玉兔燈籠，今年本來想整一個郁得嘅兔仔燈籠，大概唔超過手掌咁大。試左好幾個產生動能嘅方法，包括人手推動、風箱同埋純風力，效果都唔係咁好，好難同時兼顧燈籠外形、發光、細尺寸同埋郁動，試到第4個proto，變得好複雜好難整，兔仔跑嘅動態亦都唔似，於是我決定狠狠地從頭嚟過。 係咁多個元素入面，最想做到嘅當然係兔仔跑嘅動態，希望用風力推動，亦可以話係產生動能最直接嘅方法，咁樣結構就可以簡化好多 (簡化係最難⋯)。捨棄左一堆前設之後，專心諗點樣用風車令到兔仔跑。 一開始嘅諗法，兔仔係立體有四隻腳，風車同兔仔係呈90度，風車嘅動力要用齒輪先可以轉動到兔仔腳，然而同時要推郁四肢，風車要夠大，齒輪位置要好準確，係咁有限嘅空間入面，簡單講即係唔work⋯ 結論係風車必須真接轉動一個機關，下刪3000字，最終嘅製成品用風車轉動轉盤，轉盤再推動做出向前跑嘅動態。 物料： 一直想做到鐵皮玩具嘅效果，之前用嘅鋁罐質地太薄，膽粗粗試下剪開個月餅鐵罐，估唔到鐵皮嘅效果剛剛好！又唔需要用大型機器處理，試到呢個回收物料，真係好開心🥲 多謝咁多位熱心捐贈鐵盒嘅朋友，有啲靚到唔捨得用🥹